"جُنوح"
الجُنوح هو مصطلح بيستخدم للدلالة على الإخفاق أو التعثر في اتمام مهمة أو القيام بعمل ما على الوجه الصحيح.
كنا اتكلمنا زي النهاردة من شهر بالضبط، في 22 نوفمبر اللي فات تحديداً، عن مدى جمال وروعة الأحداث والتفاصيل اللي بتتقدم في مسلسل الغرفة 207.
الكلام أو الانطباع كان لحد الحلقة السادسة. بس على ما يبدو، وللأسف، أن الانطباعات الأولى لا تدوم.
----------------------------------------
لو لسه ما اتفرجتش وخايف من الحرق، وقف قراية لحد هنا بقى ومتكملش.
----------------------------------------
وأنا هنا لما بقول للأسف ما بتكلمش عن الأخراج، والتمثيل، ولا عن أي عناصر فنية، لأن كلها من بداية المسلسل لنهايته في الحلقة العاشرة أكتر من ممتازة الحقيقة. باستثناء يعني تحفظ بسيط على الدور اللي قدمته أسماء جلال، واللي يبدو لشخصي المتواضع اللي مابيفهمش الكتير في مجال السينما والتمثيل، مُقحم على العمل، ومش مفهوم، ووجوده غير مبرر وغير ذي جدوى خالص الحقيقة.
لحد الحلقة السادسة والسابعة كمان، وزي ما سبق وقولنا هنا (https://m.facebook.com/story.php?story_fbid=10226149670682541&id=1661746075&mibextid=Nif5oz)، المسلسل كان ماشي بوتيرة مبهرة، خصوصاً لما د. تامر قرر أنه يوسع اجتهاده في تقديم العمل، ويخرج من عباءة د. أحمد خالد توفيق رحمه الله، وبدأ يقدم أفكاره هو ويمهدلنا الطريق للحدوتة الكبيرة اللي المفروض هتفسر لغز الغرفة/الفندق/الخواجة أبو مايكل/ الخواجة مايكل نفسه/اللوحة/الخواجة ألفريدو/الدكتور سليم، وطبعا قبل كل دول مدام ريهام "ربنا يجعل كلامنا خفيف عليها".
المجهود اللي بذله د. تامر إبراهيم، كان حقيقي مبهر وجميل وبشكل يفوق الوصف بالنسبة لي، لحد الحلقة السابعة وبس. الحلقة اللي كانت بتدور عن الصحفي حسن فوزي واللي قدمها ببراعة كبيرة الفنان أحمد الرافعي. ثم .. بخ يلا هنرش ميه يا جماعة.
فجأة .. وبدون أي مقدمات، ومع النهاية القوية جدا للحلقة السابعة بتجميعة الصور اللي عملها وكيل النيابة لمدام بخ، قصدي مدام ريهام، واللي كان من المفترض أنها تكمل بقى في الثلاث حلقات الباقيين ونشوف تفسيرات منطقية وشرح وبتاع، كل شيء راح وانقضى وخيشنا في الحيطة، وجنحت السفينة زي ما بيقولوا للأسف.
حقيقي يعني مش قادر افهم ولا استوعب ايه سبب اننا نضيع حلقتين كاملين على الاستاذة أسماء وهدومها بدون أي اضافة لقصة العمل ولا أحداثه، وايه اللي حصل في الحلقة الاخيرة ده وليه، ليه جمال هو السبب وبإي منطق. فهمت ايه انا معلش. وليه استنى جزء تاني يا عالم بقى هيتصور أو ما يتصورش عشان افهم الحدوتة الكاملة وابعادها وتفاصيلها.
وأنا هنا عتابي موجه لد. تامر إبراهيم اللي معروف عنه أنه كاتب عبقري، لدرجة أن بعض قراء د. أحمد الله يرحمه وصفوه بأنه الخليفة والوريث الشرعي للقب العراب، وأنا واحد من الناس دي اللي استبشرت خير في كتاباته خاصة بعد ثنائية صانع الظلام. بس على ما يبدو كده السينما سحبت مننا د. تامر وتوقف انتاجه الأدبي تماما، لدرجة ان في مشاريع كانت مفتوحة من الروايات زي الكتاب الأسود مثلا اللي قدم منها جزء واحد بس ومحدش عارف هتكمل ولا لاء. وأخر عمل ادبي اتنشرله اللي هو (منزل السيدة البدينة) كان في 2015، وكمان مكنش بمستوى ثنائية صانع الظلام.
فمش فاهم ليه تبقى المركب ماشية تمام وفي مسارها الصحيح، فنقرر نلف الدفة ونلبس، فالمركب بدل ما توصل تخيش وتقريبا تبقى بتغرق.
ليه نضيع المجهود العظيم اللي اتبذل على مدى 7 حلقات كاملة ونقدم الولا حاجة في 3 حلقات عشان نمهد لجزء تاني. طب ما كنا ختمنا الجزء ده بتفسيرات منطقية تقدم إجابات مفهومة ونسيب الجزء التاني نوسع فيه القصة اكتر ونفرش براحتنا بقى.
للأسف، نهاية محبطة ومخيبة للآمال جداً، وخصوصا الجملة اللي كانوا ماشيين ينتوروها طول الحلقة عن جمال وكونه السبب الرئيسي لكل اللي حصل وهيحصل. اللي هوه ايه بقى يا جماعة معلش. حد عنده اجابة..
وبالمناسبة بما اني بتفرج حاليا على مسلسل (في كل أسبوع يوم جمعة) فحابب أقول إن إثارة الفزع أو الخضايض والقشعرة، مش شرط ابداً تتربط بمكياج وعيون مبرقة أو حواجب.
ممكن الرعب يوصلك من مجرد جملة بسيطة. جملة مكونة من كلمة واحدة بس زي اللي بيقولها آسر ياسين/عماد في المسلسل فيبدأ جسمك يقشعر وتستعد لمصيبة جديدة.
(نيلة) 😱
بس ده مش موضوعنا دلوقت، نبقى نتكلم فيه بعدين 😁
#الغرفة٢٠٧
#نيلة
#نشوفكم_كمان_سنة_و٣شهور_و٤ايام
#انت_السبب_يا_جمال
أظن أن كلمة الاستاذ الراحل يوسف بك وهبي (ياللهول) في وصفه لكل ما هو جميل بعظمة، وبديع بروعة هي أنسب ما يمكن التعبير بيه عن المرحلة اللي وصلها مسلسل الغرفة 207.
الحقيقة أن كلمة ياللهول حتى شايفها قليلة لوصف العمل الدرامي اللي الكل كان متخوف منه بعد تجربة ما وراء الطبيعة السيئة في معالجة النص الأصلي لصديقنا واستاذنا الراحل د. أحمد خالد توفيق، خصوصاً بعد الحلقة السادسة، اللي معاها اتضح بشكل كبير جداً الجهد المبذول من د. تامر إبراهيم في تضفير عمل درامي قوي جداً معالج بذكاء شديد، وبدون ما تهربد النص الأصلي وتشوه ملامحه. بل بالعكس المعالجة هنا أضافت للعمل عمق كبير على مستوى الشخصيات وأصل القصة. حقيقي جهد يستحق الثناء والاشادة والتصفيق بشدة 👏👏
ليه بقول بعد الحلقة السادسة تحديداً، عشان، ومن غير ما أحرق للي لسه ما اتفرجش، احنا كنا ماشيين طول الحلقات الخمسة اللي فاتت بنسق ثابت هو إضفاء عمق لبعض الشخصيات باضافات محدودة واحداث قليلة تخدم الجو العام للنص الأصلي. تحابيش كده أفادت المسلسل جدا من وجهة نظري.
بس الحلقة السادسة، ورغم أن عنوانها جاي من حدوتة جوه الرواية زي كل الحلقات السابقة، لكنها نقلة رهيبة على مستوى الحكي وتأصيل القصة بمعالجة د. تامر مش نص د. أحمد. اختلافات ضربت في النفوخ والله لدرجة اني بقيت قاعد مبرق ومش عارف هو ازاي بيربط الحاجات ببعضها كده، ازاي جاتله الفكرة ومنين.
كل ده كوم بقى، وعملية البناء اللي قام بيها عشان يظهر شخصيات محددة تأثر في عمق الحدوتة الكبيرة زي شخصية عم مينا، سارة، والست عبير. وافظعهم بلا جدال شخصية الخواجة مايكل اللي كل قراء نص د. أحمد عارفين كويس جداً أنه مش هو ده نهائي لا بالوصف ولا بالشخصية ولا التصرفات ولا تاريخ الشخصية.
تحول محوري في شخصية رئيسية وصلنا للعظمة اللي شوفناها في الحلقة السادسة ولسه هيبان تفاصيلها اكتر في باقي الحلقات.
حتى شخصية الغرفة اللي بتجسدها ريهام عبد الغفور مبهرة بالنسبة لي وفيها تفاصيل حلوة جدا.
وده بيوصلنا لآخر نقطة. وهي اختيار كاست العمل بالكامل، مفيش حاجة مجلية ما شاء الله حتى ضيوف الشرف. حقيقي الواحد فرحان واتمنى باقي الحلقات متخيبش أملنا وانا واثق في شغل د. تامر ومتأكد أن اللي جاي عظمة اكبر واحلى.
وحسبي الله في اللي بوظ ماوراء الطبيعة برؤيته الفنية المنيلة بنيلة.
#الغرفة٢٠٧
نهاية ملحمية اكتر من مبهرة للموسم الرابع لـ Stranger Things في انتظار الموسم الخامس والأخير.
الغاز كتير وحاجات مكنتش مفهومة اتحلت الموسم ده، لقطات الايموشن كانت عظيمة جداً، مش عاوز احرق للي لسه ما اتفرجش بس في لحظات عياط كتير ولحظات ضحك فشخ.
الخضات الموسم ده صعبة أوي وبجد فيها حاجات كتير تخوف. في طبعا حاجات مش منطقية بشكل كامل زي ما حصل في الموسم التالت بس هتعدي يعني مش حوار لأن السيزون عالمي فعلا.
التناسق بين الأحداث كان حلو جدا جدا جدا خصوصا في حلقة الختام. وعلى عكس المواسم اللي قبل مكنتش نهايته وردية تمهيدا بقى للمعجنة اللي هتحصل في الموسم الخامس بعد ما كل الأوراق انكشفت.
لسه حاسس ان L موصلتش لقوتها القصوى، في حاجة مستخبية ومتحاوط عليها اظن عشان السيزون الجاي.
في لقطات كتير جدا الحقيقة الموسم ده كانت عالمية بس حتة الجيتار في الحلقة الأخيرة هي التوب بالنسبة لي.
اخيرا. حسبي الله ونعم الوكيل فيك يا هباب البرك يا اللي اسمك جيسون الطين.
ياترى ايه اللي هيحصل الموسم الجاي بعد ما خلاص عرفنا مين رايح فين وبيعمل ايه. خلينا نشوف
بأمانة يعني. حسن شحاته هو آخر مدرب كنا بندخل معاه كأس الأمم واحنا عارفين هنلم الضحايا من تحت أيديه، ولولا التوفيق يمكن كنا شفناه بأفضل جيل في تاريخ مصر الكروي في كأس العالم.
انما الأخ بتاع البلح اللي ماسكنا دلوقت ده منستناش منه اي حاجة. ده حتى المقارنة مع حسن شحاته في نسخة ذي 2010 مثلا مش من حق كيروش والله ع العك اللي شفناه وبنشوفه من وقت البطولة العربية.
شحاته كان داخل 2010 وهو خسران ملحق تصفيات كأس العالم ومعنويات الفريق في الأرض. والدنيا ضربت معاه قبل البطولة وخسر جهود اتنين من أهم لعيبته في اخر بطولتين كسبهم بإصابة ابوتريكة صانع الألعاب الأساسي وأهم عنصر في قوة المنتخب من 2006 ومعاه عمرو زكي دبابة الهجوم في الوقت ده.
+ خلافات أحمد حسن مع مانويل جوزيه وتقريبا نهاية علاقته بالأهلي واللي تم الإعلان عنها رسمياً بعد كام شهر من نهاية البطولة والتأثير السلبي للخلافات دي على مستواه
غير طبعا ضم شحاته لعناصر مجهولة زي جدو من الاتحاد السكندري وغياب لعيبة زي ميدو اللي استبعاده عمل قلق.
بس كل ده اتقلب 180 درجة، والمنتخب قدم نسخة قد تكون الأكثر قوة وابهار في الثلاث نسخ المتتالية اللي كسبناهم. محدش حس بغياب أبوتريكة أو عمر زكي. احمد حسن قدم بطولة كبيرة جداً خصوصا في ماتشين الكاميرون ونيجيريا. جدو كان نجم البطولة وهدافها وصاحب الفرح كمان بجوله الجميل في النهائي.
كل ده، ضيف عليه بقى أن المنتخب بالكامل مكنش فيه محترفين، على حسب ما افتكر، غير زيدان والمحمدي.
مستر كيروش بقى، اللي في فيديو ليه بعد ماتش النهاردة بيتخانق مع مشجع مصري، معاه المحترف الافضل في تاريخ مصر، كابتن صلاح اللي مشفناش اي تاثير ليه مع المنتخب من ساعة ما بقى ضمن نجوم الصفوة في أوروبا عكس كل لعيبة افريقيا اللي بنشوفها وحوش مع منتخباتها.
ده غير محترفين في كل الخطوط تقريباً. ومع ذلك السيد كيروش بيقدم بلح من وقت البطولة العربية.
لعيبة في غير أماكنها بتوظيفات ومهام عجيبة، تغيير طريقة اللعب بشكل مش مفهوم. مفيش حتى جمل خططية.
فهل ده منتخب يتقاله قافشين ومستنيين وهاتولنا الـ مش عارف مين؟
يا جماعة استهدوا بالله كده وكبروا دماغكوا 🤷
بمناسبة الزلزال اللي ضرب مصر امبارح الصبح، والحمد لله أنه عدى على خير. تعالوا نتكلم عن واحد من الأفلام الجديدة اللي بتطرح فكرة تعرض الأرض لكارثة طبيعية أو كيفية مواجهة الكوارث بشكل عامل.
فيلم Don't look up، واللي ملقتش صورة معبرة أكتر من الصورة المرفقة عشان توضح فكرته صراحة وهتعرفوا ليه في السطور الجاية. 😁
في البداية. الفيلم يتحط ضمن قائمة طويلة جدا من الأفلام اللي عالجت قصة الكوارث الطبيعية وازاي الانسان بيواجه المصاعب الناتجة عنها. على سبيل المثال لا الحصر القائمة دي بتضم
Earthquake (1974), twister (1996), Volcano (1997), Dante's Peak (1997), Armageddon (1998), Deep Impact (1998), The Perfect Storm (2000), Space Cowboys (2000), Mission to Mars (2000), The Core (2003), The Day After Tomorrow (2004), Solar Attack (2006), Poseidon (2006), 2012 (2009), Meteor Apocalypse (2010), End of the World (2013), Exploding Sun (2013), Hours (2013), Pompeii (2014), San Andreas (2015), The Wave (2015), The Finest hours (2016), Geostorm (2017), Crawl (2019), Greenland (2020)
في عناوين منها مشوفتهاش بصراحة ومعرفش عنها حاجة بس لقيتها ضمن بحث سريع عملته عن النوعية دي من الأفلام اللي بتقدم فكرة انقاذ الأرض أو تعرضها لخطر الفناء نتيجة كارثة طبيعية.
يمكن من ضمن العناوين دي في فيلمين بس اللي أعرفهم وشفتهم وهما الأقرب لفيلمنا اللي بنتكلم عنه
Armageddon (1998) وSpace Cowboys (2000) ومعاهم Deep Impact (1998) اللي ناوي اشوفه ان شاء الله.
فكرة أن في مذنب/كويكب/جسم فضائي في مسار تصادمي مع الأرض ومفيش حل غير أن يتم ارسال بعثة لمحاولة تدميره أو تغيير مساره قبل ما تحصل الكارثة. يمكن شفنا كمان معالجة كوميدية للفكرة دي في مسلسل الكبير. 😂
طب إيه بقى المختلف اللي بيقدمه Don't look up المرة دي؟
الحقيقة الفيلم كان ماشي بنفس الوتيرة المعتادة للأفلام السابق ذكرها، أو يعني بدأ كده، علماء بيكتشفوا الجسم المجهول ده وحساباتهم بتحدد بدقة أنه متجه رأسا للأرض وهيفشلق الكوكب ويبقى سبب في فناء الجنس البشري وانقراضه زي ما سبق وحصل مع الديناصورات. جميل؟ لاء مش جميل.
عشان بذكاء شديد، الفيلم بيقدم الفكرة من منظور مختلف تماماً عن اللي اتعودنا عليه، من تجميع الفريق المناسب للتعامل مع الكارثة وتدريبهم لحد ما يتم تدمير الخطر والناس في ناسا تعيط وتحضن بعض والفرحة تعم الأجواء. 😇
وعشان ببساطة احنا بقينا في عصر مختلف عن التسعينات وبداية الألفية. عصر مبقاش للعلم فيه صوت مسموع وكلمة موثوقة يُعتد بيها بالشكل الكافي، والسيطرة الكاملة بقت للميديا وبرامج التوك شو والتريندات والهاشتاجات ومن وراهم طبعا رجال الأعمال اللي بقوا، صراحةً أو في الخفاء، بيتحكموا في مصائر الشعوب ويديروا الحكومات والدول حسب أهوائهم الشخصية ومصالحهم.
فكل الهلع اللي بيحصل للعلماء مع اكتشاف الجسم المتجه للأرض ده وتأكدهم من المسار التصادمي وتوقيته، ثم محاولاتهم المستميتة لاقناع المسئولين والمواطنين على حد سواء بجدية وخطورة الموضوع بينقلب 180 درجة لكوميديا سوداء وأنت شايف عبث تام في التعامل مع خطر بيهدد حياة البشر كلهم.
عبث وصل حد الجنون بتفجير البعثة الروسية، الهندية، والصينية المشتركة اللي كان المفترض هتقوم بتدمير الجسم الفضائي ده لأن امريكا اقتنعت برؤية واحد من رجال الاعمال المتوغلين في المطبخ السياسي لدرجة أنه بيمشي كلامه على رئيسة امريكا بأن ممكن بدل ما ندمرالجسم الفضائي ده خالص، نفرقعه بس ونحوله فتافيت وحتت صغيرة ملهاش ضرر ونستفيد بالعناصر المعدنية النادرة الموجودة في تكوينه واللي هي بمثابة ثروة عايمة في الفضاء ملهاش صاحب، فمينفعش ترموا النعمة ويلا بينا نبقى اصحابها ونتنغنغ.
طبعا الجنون والهبل ده كان سبقه صراع درامي من خلال وسائل الاعلام نفسها مرئية ومقرؤة بين جبهة العلماء (اللي ملهمش في ليلة الميديا دي أساسا) من ناحية، وبين المسئولين من ناحية تانية لتأكيد/تكذيب القصة من أساسها، واللي منها جه اسم الفيلم. جبهة بتصرخ للصالح العام وبتقول بصوا فوق متكدبوش عينيكوا هنموت كلنا، والجبهة التانية السياسية بتقول بلاش هبل وتضخيم للأمور وأوعوا تبصوا فوق هتتعبوا ومفيش حاجة تبصوا عليها من الأصل.
الفيلم حقيقة بيقدم معالجة مرعبة من وجهة نظري للواقع اللي احنا فيه فعلا، الميديا المسيطرة على كل حاجة في حياتنا دلوقت بتغيب العقول وتوجهها حسب رغبة اللي بيتحكموا فيها، فتلاقي الأخبار التافهة والسطحية عن حياة المشاهير ومين طلق ومين اتجوز ومين مصاحب ومين بيعيط هي اللي متصدرة ومغرقة الدنيا، في حين أن اخبار تانية قد تكون اكثر اهمية، ولا بيتجاب سيرتها ولا حد يعرف عنها حاجة.
ساعات وساعات من الحشو والهراء الفارغ في برامج التوك شو والصحف والبرامج الحوارية بيتم دعمها على الأنترنت بالهاشتاجز والتريندات لتسويق افكار/اخبار متخلفة، ولما يظهر شيء مهم أي كان هو ايه، بيدوب ويختفي في الزحمة ومحدش بيتابعه ولا يهتم بيه.
فيلم Don't look up قدم بامتياز نسخة لما قد يصل إليه كوكبنا العزيز في حال قرر واحد من الاجسام الهائمة في الفضاء أنه يغير مساره ويحود يشرب شاي عندنا، وده مش مستبعد خالص بالمناسبة.
اخر حاجة. الإيفيه بتاع جنيفر لورانس والسناكس كان عالمي في توقيتاته. حاجة كده شبه ضفة غفران الغريب لو حد بيتابع البلاتفورم. 😉
بالنسبة للأداء التمثيلي فكان هايل الحقيقة، خاصة الثنائي ليوناردو ديكابريو، وجنيفر لورانس، ومعاهم طبعا ميريل ستريب، وجونا هيل، وكيت بلانشيت والجدع الغتت مارك رايلانس.
ينصح جدا جدا بالمشاهدة. تقييمي 10/7.5
هل دي بداية ولا دي نهاية الغزو؟ 😁
من حوالي أسبوع خلصت حلقات الموسم الأول من مسلسل Invasion/غزو الخاص بمنصة آبل تي في، والمكون من 10 حلقات، في إنتظار الموسم التاني اللي تم الاعلان عن البدء في تصويره بالفعل، وغالباً هيتم طرحه أواخر السنة دي أو بدايات 2023 حسب الأخبار المنتشرة.
ليه بتكلم عن المسلسل، وإيه المميز فيه أصلا عشان نحكي عليه؟ 👈👉
بدايةٍ المسلسل مختلف تماماً عن معظم الأعمال الفنية اللي سبق وشفناها عن غزو من عالم الفضاء الخارجي لكوكب الأرض الغلبان ده. (مش عارف ليه متعملش لحد دلوقت عمل فني واحد نغزو أحنا فيه أي كوكب في المجرة أو براها؟ هل للدرجة دي مستهأفين نفسينا كبشر؟).
المهم. معظم الأعمال الفنية اللي اتكلمت عن فكرة الغزو بشكل عام سواء كانت مسلسلات، روايات، أو أفلام (اللي هي الأكثر أنتشاراً) بتعرض الفكرة من منظور واحد تقريباً، وهو غزو مفاجيء واجتياح كامل من عدو أكثر تفوقاً في العدد والعتاد، ثم مقاومة يائسة ومحاولات متكررة للتغلب على العدو الرهيب المفزع ده، حتى الوصول للخاتمة بالنصر وانتهاء المحنة، وهيييه والناس تصقف ويحضنوا بعض وهما بيعيطوا.
الكلام ده هتلاقوه في أفلام كتير جداً زي مثلاً
The Tomorrow War، Independence Day، Pacific Rim، Cowboys and Aliens، Edge of Tomorrow، war of the worlds، Battleship، The Great Wall، Battle Los Angeles.
إيه بقى المختلف في المسلسل بتاعنا؟
الحقيقة أن المسلسل بالكامل من أوله لاخره بيلعب على وتر تصدير التوتر للمشاهد، في 10 حلقات أنت مش عارف فعلياً إيه اللي بيحصل. هل ده غزو فعلاً. إيه اللي بيهاجم الناس والمنشأت وعامل الدمار الرهيب ده كله؟ فين العدو ده أساساً؟ وليه الغزو ماشي بالوتيرة البطيئة دي؟ فين المركبات الفضائية اللي بتظهر بين يوم وليلة؟ فين الفضائيين اللي بيتمشوا بين البيوت يصطادوا الناس ويفرتكوا المارينز؟ 🛸👽
مفيش.. فعلياً أنت عايش مع أبطال المسلسل اللي بتشوف قصصهم المختلفة وتعاملهم مع اللي بيحصل ده وأنت زيك زيهم، مفيش أي نقطة تفوق بالنسبة لك غير محاولات الاستنتاج وربط الأحداث ببعض. الغزو الفضائي ماظهرش بشكله الواضح المتعارف عليه غير في أخر حلقتين تقريباَ وبرضه مش بنفس الشكل اللي سبق وشفناه في عشروميت فيلم سابق.
المسلسل بيقدم فكرة الغزو الفضائي من منظور جديد مثير للإعجاب رغم تقييم المسلسل المنخفض على IMBD وعلى مواقع تقييم تانية زي rotten tomatoes. بس هو الحقيقة يستحق المشاهدة لأنه اخد الـ risk وقرر يمشي عكس التيار ويحط المشاهد في نقطة مفصلية مع النوع ده من الأعمال الفنية اللي بتقدم الـ apocalypse/نهاية العالم. إلا وهي المعاناة النفسية، لحظات الصدمة والخوف، الترقب، التعامل مع المجهول، والخوف من كل لحظة جاية أنت مش عارف إيه اللي هتواجهه فيها.
حد هيقولي طب ما a quiet place مثلا بالجزئين بتوعه قريب من السكة دي.
تمام، هتفق معاك، بس في نقطة اختلاف كبيرة هنا عن فيلمين الأخت العزيزة إميلي بلانت. لأن الغزو بشكله المتعارف عليه حصل، العدو مش مجهول، بل ووصلوا لطريقة للتعامل معاه حتى لو متمش نشرها على نطاق واسع. الخوف والترقب والحذر نابع هنا من طبيعة العدو نفسه اللي بيهاجمك بسبب اعتماده على الأصوات. بينما في Invasion أنت والأبطال عميان حرفياًَ. محدش فاهم ولا شايف ولا عارف أي حاجة.
طيب هل نجح المسلسل في طريقة التقديم الخزعبلية غير المعتادة دي؟ إلى حد ما آه، لأن كان في أوقات من المط والتطويل ملهاش لازمة، حشر لقصص من اياها اللي بقت علامة مسجلة في كل الأفلام والمسلسلات دلوقت من غير داعي وبلا أي تأثير على الأحداث لمجرد مواكبة التوجه العالمي السخيف المقرف ده (جتهم القرف هما واللي بيدعموهم 😡)
+ غموض كبير جدا قد يكون مبالغ فيه في بعض الأحيان، لدرجة أن في تفرعات قصصية لبعض الشخصيات مكنتش مفهومة أوي زي قصة كاسبر مثلا.
حتى نهاية المسلسل نفسه كان فيها جرعة عالية من الغموض واللي هي بترجعنا لأول سطر خالص.
كل ده بقى كان بداية لغزو صامت في الخباثة وهنبدأ نشوف هلع حقيقي، ولا كده خلاص بخ انتهى الأمر وهندخل في قصص حكي عالم ما بعد الفاجعة وطريقة تعامل البشر، حكومات الدول، أجهزة الأمن بعد ما تم استعادة الأرض؟ الحقيقة محدش عارف.
طبعاً كل الكلام السابق ده لا يعني أبداً أنه مسلسل فشيخ خارق للطبيعة، بالعكس، المسلسل في عيوب وكتير كمان نتمنى يتم تداركها في السيزون الجاي، بس يظل حاجة مختلفة تستحق المشاهدة. فـ enjoy لو ناويين تتفرجوا.
فيما يخص طقم الممثلين. فمفيش حد مميز أوي وواخد اللقطة، الطقم بالكامل ادائهم جيد جدا، وإن كانت جلشيفته فرحاني/ Golshifteh Farahani اللي قدمت دور انيشا تستحق التحية على تجسيد دور المرأة المصدومة في جوزها البصباص، وفي نفس الوقت بتحاول بشتى الطرق تحمي عيلتها بما فيهم جوزها نفسه 😁.
كمان بيلي بارت / Billy Barratt وانديا براون / India Brown كانت أدوارهم جيدة جداً، مع الواد الرخم بادي هولاند / Paddy Holland.
تقييمي النهائي 10/6.5 في انتظار الموسم التاني للحكم اكتر على الأمور.
سعداء الحظ اللي شافوا الأفلام الثلاثة دول يجمعوا هنا عشان هنتكلم في حوار 🎙️
مبدئيا كده تاريخ صدور كل فيلم فيهم على الترتيب
Edge of tomorrow 2014
The great wall 2016
The tomorrow war 2021
ليه ذكرت التواريخ؟ عشان الحوار اللي هنتكلم فيه ونتباحث قد يتعلق بشكل أو بآخر بمين اللي جه الأول، مين اللي صحي بدري ووقف في الطابور من أوله، مين اللي رفع صوباعه اول ما المستر سأل، وجايز نعرف كمان مين اللي اكل الجبنة 😂😂.
قبل ما نكمل، لو مشوفتش اي فيلم في الثلاثة، يستحسن تقف هنا ومتكملش قراية عشان هنحرق جامد فمحدش يعيط 😘.
المهم، قصص الأفلام الثلاثة بشكل ما بتدور حوالين غزو فضائي، وشر بيور بيظهر فجأة ويطيح يمين وشمال بدون امل في المقاومة أو المواجهة لعدم التكافؤ في العدد والقوة بين الطرفين.
بس الملفت بقى أن الشر الفضائي الرهيب ده في الـ 3 أفلام بيتمحور حوالين وجود ألفا مسيطر وبيوجه القطيع اللي معاه واللي هما في نفس الوقت بيستميتوا في الدفاع عنه وحمايته من اي اذى. نفس الفكرة بالضبط، بل إن ألفا The great wall و The tomorrow war كانت female ومش فاكر الصراحة كانت برضه في Edge of tomorrow كمان كده ولا ايه، لو حد شاف الفيلم قريب يفكرنا.
اللطيف اكتر أن وصول الغزو الفضائي في الفيلمين تحديدا كان بالصدفة مش غزو مقصود يعني، في The great wall كان نيزك ضرب الأرض وهو شايل البلاوي الخضراء دي، وفي The tomorrow war كانت مركبة فضائية شايلة مستعمرة من المخلوقات البيضاء ووقعت عندنا بالصدفة البحتة عشان احنا كوكب محظوظ 🤦.
نقط التشابه كمان في Edge of tomorrow و The tomorrow war أن الغزو كان عالمي، اكتساح للقارات كلها بلا استثناء لدرجة أن البشر كانوا على اعتاب الانقراض تقريبا. بينما في The great wall الغزو كان منحصر في الصين واتلحق هناك قبل ما يتوغل ويمرمط البشرية بحالها.
جايز تحس اني ببالغ وان الـ 3 أفلام مش شبه بعض أساسا والموضوع ربما يكون توارد خواطر يعني وبتحصل عادي، بس فكر معايا كده شوية وانت حاطط في اعتبارك كمان أن لحظات النصر كانت ملحمة مشتركة بين بطل وبطلة كل واحد فيهم بيعمل جزء من غيره ماكنش الانتصار تم، وان القضاء على الألفا بيدمر باقي الغزو بالكامل، فبتنسف فكرة التفوق العددي تماما ويبقى كل اللي عليك انك تركز مجهودك في الوصول للقائد/القائدة والقضاء عليه/عليها. ده لو عرفت توصل اساسا 😀 بس غريبة شوية مش كده 😎
بص هو أنا مش معترض خالص، بالعكس أنا بحب الـ 3 أفلام جدا الحقيقة، توم كروز و مات ديمون وكريس برات من الناس اللي بحب اتفرج على اي حاجة طالعين فيها.
والـ 3 أفلام من المجموعة اللي محتفظ بيها على اللاب ومبتتمسحش زيها زي افلام مارفل بالضبط، مش اوي يعني، بس اكيد مش همسحهم 😁
انا قلت ندردش شوية ونتشارك الخواطر يمكن مكنش لوحدي اللي قفش الملاحظات دي 👋
لو افتكرت حاجة تاني هبقى اكتبها 😀 وانت ايه رأيك 🤔
أنتِ بتخمي يا مارفل على فكرة 😅
الفيلم حلو، صحيح مش اوي يعني بس حلو، لكن مينفعش يبقى هو افتتاح الـ phase 4 خالص الصراحة ولا يتحط فيها من الأساس. هو مكانه بالضبط بعد civil war أو ممكن بعد captain marvel يمشي برضه. لأن معلش يعني الناس دي ما ظهرتش ليه في infinity war ولا endgame؟ كانوا مسافرين بيصيفوا ولا راحت عليهم نومة مثلا، أو جايز ملحقوش حجز طيران 🤔
ماهو اصل العشوائية اللطيفة دي احنا واخدين عليها في DC universe مش معاكوا انتوا.. أو غالبا الفيلم ده معمول ترضية ومكنش في الخطة من الأساس.
بس اوكيه هنمشيها عشان خاطر سكارليت بس 😂 واختها اللي مش عارف اسمها دي. ونستنى الافتتاح الرسمي للـ Phase 4 مع الـ Eternals و الأخ shang chi
مشاعر متضاربة الحقيقة ولون رمادي كده الواحد عايم فيه ومش قادر يحدد، هل أنا مبسوط بعمل مصري هو الأول من نوعه بيتقدم بالمستوى المبشر ده، ولا حزين على كمية الأخطاء والسقطات والجرافيك العجيب ده اللي بوظ فرحة خروج اعمال د. أحمد اخيرا للنور، وهي للأمانة تستحق اكتر من كده بكتير.
الغريب، ورغم المشاعر الكوكتيل اللي ملهاش طرف تتمسك منه دي، الا اني زعلت لما خلصت فرجة، زعلت لما حسيت أن المسلسل الـ 6 حلقات، مكنش 8 ولا 10 لانه برغم المشاكل اللي فيه، لو اتفرجت عليه ككيان مستقل ملهوش دعوة بـ ما وراء الطبيعه هيعجبك وهتحبه (وهتقرف من الجرافيك عادي) بس هتقضي معاه وقت لطيف.
وده لا يمنع برضه أنه كعمل مستقل لا مستوحى ولا له علاقة بالسلسلة غير شوية الاسماء والشخوص والأماكن اللي اخدها، ففيه كمية مشاكل كبير جدا على مستوى الحبكة وتسلسل الأحداث والتقديم للشخصيات، والمشاكل دي كلها قررت تنط وتتجمع كلها بشكل فج في حلقة العساس ( وكمل عليها الجرافيك التعبان عشان يخربها).
المسلسل فيه اختلافات ضخمة عن الروايات، وتقريبا هو قائم بشكل كامل على شخصية شيراز وارتباطها برفعت .. بس، فنتمنى في المواسم القادمة تكون القصة مترابطة بشكل محكم اكتر ويبقى في تنوع في الحكايات اللي مفيش اكتر منها في أعداد السلسلة الـ 81
أخيرا.. لو مكنش في مكسب حقيقي من المسلسل غير احمد أمين ودوره المتقن اللي رجعلنا ذكريات الطفولة فأنا راضي ومبسوط، بس الحقيقة هو في مكسب تاني .. المسلسل بكل الدربكة دي حمسني لمراجعة السلسلة كلها من بدايتها عشان استمتع من تاني بحكايات العجوز الاصلع في الليالي التي يغيب عنها القمر.
