مقدمة
اسمي جاك، وبشتغل في فرق البحث والإنقاذ التابعة لخدمة الغابات الأمريكية بقالي كام سنة.
شغلنتي إني أدور على الناس اللي بتختفي في الغابات والجبال، وأحاول أرجعهم لأهلهم، والحقيقة إن أغلب الحالات اللي بتقابلني بتكون عادية.
واحد خرج يتمشى وتاه عن الطريق، أو حد رجله اتزحلقت ووقع من فوق منحدر، ومبقاش عارف يرجع.
معظم الناس بيكونوا عارفين القاعدة اللي بنقولها دايمًا لأي حد يتوه في الغابة: خليك مكانك ومتتحركش، وعشان كده، في أغلب الحالات بنقدر نوصلهم.
بس على مدار السنين اللي اشتغلتها، قابلت حاجات عمري ما لقيتلها تفسير .. حاجات خلتني أشك إن الغابات دي فيها أسرار إحنا منعرفش عنها حاجة.
والنهارده هحكيلكم شوية من أغرب الحوادث اللي قابلتني في سنوات شغلي الطويلة هناك .. في الغابات الأمريكية.
الحكاية الأولى: الرجل الدب!
من ضمن الحالات الغريبة اللي واجهتني في سنين شغلي، في حالتين اختفاء بالذات عمري ما قدرت أنساهم.
أول واحدة كانت لطفل صغير خرج مع أبوه وأمه وأخته يجمعوا توت .. الطفلين كانوا بيلعبوا مع بعض، وأبوهم وأمهم كانوا قريبين منهم، لكن في لحظة، الأهل غفلوا لكام ثانية بس، وطبعاً لما بصوا تاني، كان الطفلين اختفوا .. اتبخروا!
الأب والأم جالهم هلع، دوروا على الولد والبنت في كل مكان، ولما ملقوهمش اتصلوا بينا.
وصلنا المنطقة وبدأنا عمليات البحث، وبعد وقت قصير قدرنا نلاقي البنت.
كانت لوحدها .. ولما سألناها "أخوكي فين؟"
البنت بصتلنا وقالت بمنتهى البساطة: " هناك .. مع الراجل الدب!"
في الأول افتكرنا إنها بتتكلم عن راجل متنكر أو حد شكله غريب، ولما حاولنا نفهم منها تقصد إيه بدأت تحكيلنا تفاصيل أغرب.
قالت إن فيه راجل ضخم جداً، وطويل جداً، جسمه كله متغطي بالشعر، جه عندهم في الغابة، في المكان اللي كانوا بيلعبوا فيه هي وأخوها ويجمعوا التوت.
كان شكله شبه الدب، بس مش دب .. وشه كان غريب.
الراجل اداها شوية توت، وطلب منها تفضل ساكتة، وقالها إنه عايز يلعب مع أخوها شوية.
وآخر مرة شافت فيها أخوها، كان قاعد فوق كتاف الراجل. قاعد ساكت، لا بيصرخ، ولا بيقاوم.
كان هادي جدًا.
طبعًا أول حاجة فكرنا فيها إن الطفل اتخطف، بس كان في مشكلة .. إحنا فتشنا المنطقة كلها، وملقيناش أي أثر لإنسان تاني كان موجود هناك.
لا آثار أقدام، ولا أي دليل نقدر نمشي وراه عشان نعرف الطريق اللي راحوا ناحيته.
بس البنت كانت مصممة على كلامها، كانت بتأكدلنا إن اللي شافته مكنش راجل عادي .. ده دب.
فضلنا ندور على أخوها أسابيع في واحدة من أطول عمليات البحث اللي شاركت فيها طول حياتي.
لكن في النهاية، ملقيناش أي أثر للولد، اختفى كأنه مكانش موجود بالمرة.
لا عرفنا راح فين، ولا عرفنا مين، أو إيه، اللي أخده.
ولحد النهارده، كل ما أفتكر البنت وهي بتقول إن أخوها كان راكب فوق كتاف "الراجل الدب"، جسمي بيقشعر وبحلم بكوابيس .. كوابيس مرعبة!
الحكاية الثانة: البنت .. والشجرة!
من ضمن الحكايات العجيبة جداً اللي صادفتني ولحد النهاردة مش قادر أفهمها، كانت لبنت شابة، تقريباً في أول العشرينات، خرجت تتمشى في الغابة مع أمها وجدها.
اليوم كان ماشي بشكل طبيعي، لحد ما البنت قررت تطلع فوق شجرة كبيرة عشان تقدر تشوف الغابة من مكان أعلى.
أمها وجدها وقفوا تحت الشجرة يستنوها، وشافوها وهي بتطلع.
بس الغريب بقى انها منزلتش .. فضلوا واقفين تحت الشجرة ينادوا عليها.
مرة واتنين وعشرة .. بس مفيش رد.
استنوا بالساعات، والبنت لا نزلت، ولا ظهرت، ولا ردت على ندائتهم المتكررة.
في الآخر لما حسوا باليأس، اتصلوا بينا.
أول ما وصلنا، الأم حكتلنا اللي حصل، وقالت إن بنتها طلعت الشجرة قدام عينيها، وإنها هي وجدها مشافوهاش وهي بتنزل، والشجرة مفيش أي حاجة تانية ملاصقة ليها عشان نقول مثلا أنها نطت من هنا لهنا!.
بدأنا ندور.
فتشنا حوالين الشجرة، وفي المنطقة المحيطة بيها، ووسعنا نطاق البحث.
لكن مفيش أثر .. مفيش دليل يوضح البنت راحت فين.
أيام واحنا بندور حوالين الشجرة يمكن نلاقيها، بس منجحناش، ولحد النهارده مش قادر أتخيل إزاي إنسانة تطلع فوق شجرة، وأهلها واقفين تحت مستنيينها، وبعدين تختفي.
محدش شافها بتنزل، وأكيد ما طارتش زي العصافير والحمام .. يبقى راحت فين؟
واختفت ازاي من غير ما نلاقيلها أي أثر .. ازاي؟
الحكاية التالتة: رجل بلا وجه!
في مرة كنت خارج في مهمة بحث مع واحد من زمايلي في الإنقاذ، كنا بندور على راجل خرج في رحلة تسلق جبال، ومارجعش في المعاد اللي المفروض يرجع فيه.
كانت وصلتنا بلاغات إن فيه دببة في المنطقة، فعشان كده خرجنا اتنين مع بعض.
بعد بحث طويل، اضطرينا فيه نتسلق مناطق صعبة جدًا عشان نوصل للمكان اللي كنا متوقعين نلاقيه فيه .. وفعلًا لقيناه.
كان واقع في شق ضيق بين الصخور، ورجله مكسورة.
حالته كانت سيئة، وغير الكسر رجله كانت مصابة بعدوى واضحة، وكان محتاج مساعدة طبية سريعة.
قدرنا نطلعه وننقله بطيارة هليكوبتر .. وبالنسبالي، المهمة كده كانت انتهت.
لحد ما سمعت من واحد من المسعفين اللي استلموه حكاية عجيبة.
المسعف قال إن الراجل كان منهار بشكل هستيري، وبيكرر حكاية واحدة طول الوقت.
إنه كان بيتسلق الجبل بشكل طبيعي، وكل حاجة كانت ماشية كويس، ولما وصل للقمة .. لقى راجل واقف هناك.
راجل وحيد، وممعهوش أي معدات تسلق، كان لابس جاكيت تقيل وبنطلون تزلج، رغم إن الوصول للمكان ده محتاج مجهود ومعدات مخصوصة.
المتسلق قرب منه، ولما الراجل لف ناحيته .. اكتشف إنه معندوش وش.
مفيش عينين.
مفيش مناخير.
مفيش بق.
مجرد سطح فاضي تمامًا.
المتسلق اتخض لدرجة إنه حاول ينزل من الجبل بأسرع ما يمكن، ومن شدة خوفه، فقد توازنه ووقع في الشق الصخري اللي لقيناه فيه، ورجله اتكسرت.
لكن ده مكنش أغرب جزء في حكايته.
قال إنه طول الليل، ولحد الوقت اللي لقيناه فيه وانقذناه، وطول ماهو محبوس ومصاب في الشق كان بيسمع الراجل ده طالع نازل على الجبل وبيصرخ صرخات مكتومة وبشعة.
أصوات مرعبة فضل يسمعها وهو عاجز عن الحركة.
الحقيقة أني خوفت، خوفت جداً لمجرد أني سمعت الحكاية بس. كنت مبسوط إني مكنتش موجود معاه فوق الجبل عشان أسمع الأصوات دي بنفسي!

التعليقات