اتفرجت مؤخراً على المسلسل الألماني Dark، اللي بدأ عرضه سنة 2017 على منصة نتفليكس ولمدة 3 مواسم بـ 26 حلقة. كل حلقة كفيلة تقلب دماغك وتبوظلك إحداثيات عقلك اللي أنا وأنت عارفين كويس أوي أنه بالأساس متلصم.
بس هو إيه اللي يخلي بني آدم راشد بكامل قواه العقلية يتابع مسلسل 26 حلقة بلغة مجعلصة زي الألماني، كل حلقة تقريبا - لو حذفنا تترات البداية والنهاية- بتقعدلها بتاع 45 لـ 50 دقيقة كاملة؟ الإجابة يا عزيزي في السطور القادمة!
في عالم المسلسلات اللي بقت مليانة قصص متكررة وأفكار مستهلكة، وأجندات منيلة بستين نيلة عليهم وعلى اللي جابوهم، ييجي مسلسل زي Dark ويقلب الموازين.
فيه مسلسلات بتتفرج عليها عشان تستمتع بوقتك، وفيه مسلسلات بتستفز حواسك عشان تركز معاها، وفي Dark اللي أنت بجد مش هزار محتاج تتفرج عليه وأنت معاك دفتر ملاحظات، وكتير جداً، جداً من صبر أيوب.
الفكرة الأساسية للمسلسل واللي هي السفر عبر الزمن، قصة مش جديدة وسبق واتقدمت في أعمال خيال علمي بالهبل سواء أفلام أو مسلسلات، بس مش بالشكل اللي أنت متعود عليه. في Dark مفيش بوابات بتلمع، ولا ناس بتجري معاها مسدسات ليزر، ولا مركبات فضاء بتطير بسرعة الصوت. Dark بيستخدم السفر عبر الزمن كأداة فلسفية عاطفية، مش كأكشن ودب طراخ.
قصة المسلسل بتدور حوالين بلدة ألمانية صغيرة اسمها "فيندن"، بتحصل فيها ظواهر غريبة، أهمها اختفاء أطفال بشكل مفاجئ. ومع الوقت، بنكتشف إن في سرّ قديم بيتكرر كل ٣٣ سنة، وإن في كهف، وفي ممر سري، وفي نفق، وفي محطة نووية، وفي جماعة سرية، وفي جهاز مجعلص في شنطة سفر، وبأكتر من نسخة، بيوصل للماضي، والحاضر، والمستقبل!
من أول مشهد هتحس بأجواء سوداوية مُقبضة كده ومش مفهومة، في حاجة غامضة مش مريحة، في متاهة وفي بازل عملاق مفروض أنه كل حلقة يتكشف منه حتة عشان نجمع الصورة الكاملة، بس اللي بيحصل أن الغموض بيزيد، والتشابك بدل ما يتفك بيتعقد. وكل ما نمسك طرف خيط ونقول أهو الدنيا هتحلو.. يتفتح خط زمني جديد أو تظهر شخصية مفترض انها من الماضي، تطلع جارك في الحاضر، أو نسختك أنت نفسك من المستقبل!
المسلسل كأفكار علمية مبني على نظريات معقدة زي الثقوب الدودية، وفكرة العوالم الموازية، لكن هي مش حصة علوم ولا درس فيزياء أو كورس مُكثف على يوتيوب، Dark بيخلط كله في دراما كئيبة وعلاقات عائلية متشابكة بشكل من الصعب جداً تحدد معاه فين الماضي وهل ده الحاضر ولا المستقبل.
الموسم الأول بيبدأ بشكل كلاسيكي طبيعي يحسسك أن ده مسلسل جريمة وغموض من اياهم، طفل بيختفي، شرطة بتحقق، عيلة بتنهار. ثم زربوووو .. تاخد الصدمة بقى، وتبدأ تكتشف إن كل شخصية ليها علاقة بحد في الماضي أو المستقبل، أو أنها هي نفسها الحد ده في الماضي، أو المستقبل.
يعني ممكن ببساطة تقابل طفل في المدرسة، وبعدين تكتشف أنه كان في مشهد تاني كراجل كبير، أو حتى عجوز، وكلهم نفس الشخص في مراحل عمرية مختلفة. فلازم تبقى بتتفرج وأنت مركز كويس جداً وإلا هتتوه ومش هتبقى فاهم مين مع مين وبيعملوا ايه!
وفي النقطة دي تحديداً، العلاقات بين الشخصيات معقدة بشكل مرعب، بس مش عشوائية. كل اسم وكل حركة محسوبة، وكل خط درامي بيكمل خط تاني. أشهرهم طبعًا هو يوناس، البطل اللي بنمشي معاه رحلته، واللي بيتحول من مراهق غلبان لشخصية مُظلمة بتحاول تكسر الحلقة الزمنية والتكرار اللي ملهوش آخر ده بأي تمن.
عندنا كمان مارثا، اللي بتظهر كحبيبة لـ يوناس، ومع تطور القصة بنتفاجيء أنها لها شخصية في عالم موازي، وبتقوده بنفس طريقة يوناس، بس بشكل عكسي لمنعه من كسر الحلقة الزمنية وتدمير العالمين!
في الموسم التاني، حبكة القصة بتوسع، والتطور النفسي للشخصيات بيبقى أوضح وبنبدأ نستوعب إن المسلسل مش عن "مين خطف وقتل؟" أنما عن "إزاي كل شخصية هي سبب الكارثة، أو على الأقل مشاركة بشكل أساسي فيها".
ومع البساطة اللي بعض الشخصيات بتتنقل بيها بين الماضي، الحاضر والمستقبل، بتبدا بقى تفكر، هل فعلا تغيير الماضي هيأثر ويغير الحاضر والمستقبل؟ ولا أساساً وجودك في نقطة زمنية بيقلب مفهوم الزمن نفسه، فيبقى النقطة اللي انت فيها الحاضر حتى لو كانت الماضي واللي أنت راجعله يبقى الماضي حتى لو هو المستقبل زمنياً!
الموضوع قد يبدو مألوف شوية لو أنت من عشاق مارفل واتفرجت على ملحمة End Game، لأنهم في مشهد اختبار السفر في عالم الكوانتم ناقشوا النقطة دي شوية بنفس الفكرة تقريباً.
المهم يعني، كل اللي فات ده لطيف وجميل بس الموسم التالت دخل علينا دخلة اندرتيكر، وقالك لا يا حضرات ده القصة فيها بعد تالت وعالم أصلي مش زي ما انتوا فاهمين.
فعرفنا إن سبب كل ده هو العالم تانهاوزر، اللي فقد عيلته وقرر يرجعهم بتجربة علمية معقدة اتسببت في تدمير العالم بتاعه ونشأة عالمين كل واحد فيهم انعكاس للتاني، وهو سبب الحلقة الزمنية المفرغة اللي عالم يوناس ومارثا عايشين فيهم.
اللي بيميّز Dark بقى عن أي مسلسل تاني إنه رغم اللخبطة دي كلها، هو مسلسل مُعقد عن الحزن، العيلة، محاولة كسر المصير. ونقدر تقول أنه واحد من المسلسلات القليلة اللي خلت الخيال العلمي يظهر بشكل ناضج، مش أفكار تافهة وأكشن سطحي، أنما رحلة داخل النفس البشرية.
مسلسل بيحترم دماغك كمشاهد. مش بيقدملك إجابات واضحة، ولا بيشرح كل حاجة بصوت خارجي، Dark هو المسلسل اللي بيمتحن ذاكرتك، ويختبر صبرك، وبيديك جرعة دراما فلسفية مغلفة بخيال علمي سوداوي. فلو ناوي تديله فرصه، هتتكافئ بتجربة مش هتنساها!
وبالمناسبة دي احب اقول ان الألمان بينطقوا كلمة ابوكاليبس حلو أوي، يمكن هي الكلمة الوحيدة اللي كنت بفهمها مع أسماء الشخصيات من غير ما اشوف الترجمة 😁😁.
تقييم/ 8.5 من 10، مع ملاحظة أن المسلسل في لقطات +18