خلصت من كام يوم مسلسل البطريق/ The Penguin المشتق من عالم الرجل الوطواط / The Batman اللي اتقدم سنة 2022 من بطولة روبرت باتينسون ومن إخراج مات ريفز، وهو بالمناسبة واحد من افضل افلام باتمان اللي شوفتها كقصة وإخراج وصورة بصرية، وإن كان مش واضح لحد دلوقت بعد ما جيمس جن مسك DC هل هيتم تقديم تكملة للجزء ده وتكمل ثلاثية ولا خلاص كده بخ.
نرجع للبطريق، اللي هو المفروض بيكمل على النهاية اللي وصلها الفيلم بشخصية رجل العصابات اوزوالد كوب/البطريق، فلازم تكون شوفت الفيلم عشان مش هتفهم اي حاجة لو اتفرجت على المسلسل خبط لزق كده.
المسلسل بيقدم لمحة عن قصة صعود أوز من مساعد مهمش لرجل العصابات كارماين فالكون، لانه يبقى واحد من أكبر زعماء عالم الجريمة في جوثام وما حولها 😀.
وبحكم أن الفيلم كان يعتبر year one بالنسبة لباتسي، وازاي ظهر فارس الظلام في المدينة الموبؤة المنيلة بستين نيلة دي، فالمسلسل برضوا على نفس النهج، بيشرحلنا ازاي أوز وصل للنفوذ المرعب اللي اتعرض في قصص الكوميكس والانيميشن على مر السنين.
قصة المسلسل مبنية بشكل اكتر من ممتاز، ورغم اني مش من هواة الأعمال اللي بتسرد سير المافيا والعصابات والأجواء اللي كلها خيانات ومسدسات ورصاص طايح يمين وشمال مع شوية مكائد ومؤامرات وافخاخ، فالمسلسل شدني من اول حلقة لآخر مشهد بايقاعه السريع وقصته المترابطة. ده غير الاداء الخزعبلي للنجم كولين فاريل، اللي لو أنت مش عارف ملامحه الحقيقة مش هتصدق ابداَ أن ده مش ممثل فعلا بالملامح دي.
مكياج عبقري وأداء فوق الممتاز بشويتين تلاتة، يعني أنا مثلا سبق شوفت كولين في أعمال تانية زي Total Recall، Daredevil، Minority report، Fantastic beasts وغيرها من افلام كان له فيها دور حلو ومميز، حقيقي مركزتش معاه اوي في The Batman خصوصا ان دوره كان قصير ومشاهده قليلة، فحتي منتبهتش أنه هو فعلا كولين فاريل، بس في المسلسل الراجل قدم اداء فخم ورهيب.
المسلسل نفسه بقى مزيج خزعبلي من المؤامرات، الخيانة، النقص، قلة الأصل، الخبث، الدهاء، وكتير اوي من الجنون اللي هو ما ينفعش تعلق وانت بتتفرج غير يـ ولود الـ، أو يخربيتك يابن الـ خصوصا اخر مشهد في آخر حلقة اللي هو يوصلك أن الراجل ده ملوش عزيز ولا حبيب نهائي. مصلحته ومن بعدها الطوفان. فهو بلا جدال كيان كريه ماشي بيتحنجل قدامك بعرجته المميزة، وبيجبرك انك تكرهه وتلعن تصرفاته في كل لحظة. عبقرية أداء لا توصف فعلا.
وبالمناسبة، المسلسل بيردم على العبث اللي اتقدم عن أصل الشخصية وسطوتها في فيلم تيم بيرتون Batman Returns سنة 1992. الشخصية اللي قدمها داني دايفيتو بشكل مثير للشفقة والضحك، بعكس اللي ظهر في المسلسل كتاصيل شيطاني سوداوي لواحد مجنون من صغره بيدور على نفسه وبس على حساب اقرب الناس ليه.
جدير بالذكر أن مش بس كولين فاريل اللي كان عبقري وغول تمثيل، اداء كريستين ميلوتي، رينزي فيليز، ديردري اوكونيل، وحتى رايدر آلان اللي قدم دور أوز الطفل كان مبهر وحقيقي فشيخ.
فنتمنى يعني أن اجزاء الفيلم تكمل بقى ياعم جن ربنا يهديك، ونشوف مواجهة جديد بين البطريق وباتمان بعد ما كل واحد فيهم ابتدى يسيطر على العالم بتاعه في قلب مدينة الظلام.
ينصح جدا بالمشاهدة. 10/8.5