من حوالي 5 سنين كده، لو فاكرين يعني، كنا اتكلمنا عن الفيلم الكوري العبقري Forgotten. ووعدت وقتها أني من فترة للتانية، هتفرج على حاجات شبهه بأفكار بره الصندوق، ورغم صعوبة اللغة الكورية ومخارج حروفها اللي كلها اوووووووووه و أييييييي دي، بس فعلا بيقدموا حاجات عنب وتستحق المشاهدة.
هل ده معناه إني طول الخمس سنين ما شوفتش حاجة كوري؟ لا طبعًا، بس مش كل حاجة بتتفرج عليها بتستفزك تكتب عنها، خصوصًا لما تكون بتتفرج متأخر… أو لما تكسل لحد ما تنسى كل الكلام اللي رتبته في دماغك. Sorry 🙃
المهم يعني المرة دي بقى جايبلكم مسلسل لوز العنب، اسمه Light Shop.
المسلسل أُنتج وعُرض على Disney+ في ديسمبر 2024 ومكون من 8 حلقات، ومقتبس من ويب تون بنفس الاسم صدر عام 2011. يعني المسلسل اتعمل بعد 13 سنة كاملة من ظهور العمل الأصلي. بس ثواني .. يطلع إيه الويب تون ده؟
هقولك. الويب تون هو ببساطة نوع من القصص المصورة الرقمية، اتصمم أساسًا للقراءة على الموبايل. أبرز فرق بينه وبين المانجا أو الكوميكس التقليدي إنه غالبًا بيتقدم كشريط رأسي طويل بدل الصفحات المنفصلة. شريط طويل بتنزل فيه لتحت (Scroll)، وكل الأحداث بتظهر تدريجيًا أثناء النزول، وده بيخلي الإيقاع مناسب جدًا للموبايل والشاشات الصغيرة.
مؤلف العمل الأصلي، اللي بعد البحث عرفت ان اسمه Kang Full عنده اكتر من عمل بنفس صيغة الويب تون دي، بعضهم اتحول سينمائيا، إما مسلسل أو فيلم. والمثير في اعمال الراجل ده أن عدد من أشهر أعماله مرتبط ببعض وبيتحرك داخل كون مشترك. حاجة كده زي شغل مارفل اللي بتتجمع فيه القصص وتتربط ببعضها في عالم كامل بس على صغير طبعاً.
نرجع بقى لـ Light Shop وليه المسلسل يستحق المشاهدة، وبشدة؟ بدايةً عرفت المسلسل من كام ريل قصيرين من اللي بيطلعوا عشوائي دول على فيسبوك. تصورت في البداية انه مسلسل رعب أو عن أساطير محلية وخوارقيات بارانورمال وأنا بحب الحاجات دي جداً جداً يعني. بس المفاجأة أن المسلسل فعلاً بيسحبك من الحتة دي عشان تتفاجأ بحاجة تانية خالص.
Light Shop بيبدأ فعلاً كمسلسل رعب، وتدريجيًا تكتشف إنه في الحقيقة دراما إنسانية عن الحياة، والموت، والندم، والفرص الأخيرة. قصة عبقرية عن تجارب اللي قربوا من الموت، أو مش بالضبط عن تجاربهم، إنما هما شافوا ايه خلال فترة الغياب عن الوعي والغيبوبة لحد ما فاقوا تاني.
المسلسل فيه حوالي 8 حكايات أو خطوط درامية، ويمكن اكتر، حسب طريقة تقسيمك لشخصيات المسلسل، بيترابطوا كلهم في اخر حلقتين عشان نبدأ نشوف الصورة الكاملة والهدف الأساسي من القصة الرئيسية للعمل.
مفيش شك أن القصص والحواديت والشخصيات كلها حلوة ومبنية بعمق حقيقي يخليك تعيش معاهم وتتابع خطواتهم عشان تعرف ايه اللي وراهم، بس من اكتر القصص المؤثرة والغريبة في الحدوتة هي قصة الحبيبين Lee Ji-young وKim Hyun-min. أساساً الرعب بدأ بيهم هما، قبل ما نفهم بالضبط أن الموضوع مش رعب أوي، إنما دي خطوط درامية هتتكلكع كمان حبة عشان نشوف الصورة الكاملة.
بس الغريب، ورغم أن كل القصص تقريباً كان لها نهاية منطقية، فقصتهم هما تحديداً بدأت معقدة وقفلت منيلة بستين نيلة، الله يسامحها امه بقى ذنب البت في رقبتها، هي اللي جابت أجلها.
طريقة السرد وترابط القصص، كان تحفة ومفيش لحظات وقوع ولا ملل طول الـ 8 حلقات. التصوير والزوايا والإخراج والمونتاج والمؤثرات رهيبة. في كام خضة في أول 3 أو 4 حلقات لو أنت مش متمرس على مشاهدة النوعية دي من الأعمال هتتفزع بجد. نفس خضات فيلم The Grudge لو حد اتفرج عليه.
أنا شايف إن الضوء ده كان هو الـ Light Shop أو المنارة اللي بتنقذ التايهين والهايمين من غير دليل ولا أمل في النجاة. الموضوع اشبه بأنك تكون راكب سفينة مثلا في بحر هائج وبتهتدي على ضوء منارة جاي من بعيد جداً.
مش عارف الحقيقة هل صناع العمل كانوا يقصدوا فكرة المنارة دي بالتحديد، بس في مشهد في اخر الحلقة 8. الكاميرا بتعمل فيه زووم اوت وبنشوف الـ Light Shop اللي منور وسط الضلمة والعتمة والليل، وكل ما الكاميرا تبعد يبان نور تاني، وتالت، ورابع، وخامس وهكذا.
بالنسبة لي كل بقعة نور في المشهد ده هي منارة تانية، وفرصة نجاة جديدة لحد تايه في العتمة، كأن في رسالة بتقولنا أن الـ Light Shop مش واحد وفي أكتر من أمل وطريق نجاة لكل الضايعين.
يمكن تفسيري صح، ويمكن لا .. دي يمكن أكتر حاجة عجبتني في Light Shop. إنه من نوع الأعمال اللي بعد ما يخلص، تفضل بتفكر فيه وأحداثه مكملة جوا دماغك كام يوم بتحاول تعرف هل أنا فهمته صح ولا محتاج اتفرج مرتين تلاتة كمان عشان اتأكد.
حقيقي المسلسل تحفة مش حابب احرق في أحداثه أكتر من كده. فلو أنت بتحب النوعية دي من الدراما، اللي بتشغل الدماغ وتخليك تتأمل وتفكر وتحاول تربط الأمور ببعضها .. فـ Light Shop يستحق وقتك جدًا. تقييمي 8.5/10