اتفرجت على الفيلم الكوري Forgotten ودي كانت أول مرة اشوف فيها فيلم كوري بشكل عام، وحاجة بعيد عن هوليوود وبوليوود بشكل خاص. مع التأكيد على اني مش متابع برضه السينما الهندية اوي يعني، بس ساعات بيقع تحت ايدي حاجات لطيفة على MBC بعيد عن النخع بتاع الضرب والطيران اللي هما مشهورين بيه ده، ساعات بيقدموا قصص ومأساويات لطيفة اوي وانا بحب الحاجات دي.
نرجع لـ Forgotten فقصة الفيلم فيها تويست مبهر الحقيقة ويشد جدا للمتابعة برغم اللغة العجيبة اللي كانت عاملة زي ما يكونوا بيحدفوا طوب على وداني. بس للأسف التويست ده بيفقد قوته ومعناه والهدف منه وبيضيع شغف المتابعة مع القفلة العجيبة اللي انقفل بيها الفيلم بشكل يخليك تحس انهم كانوا متسربعين أو يلا بقى احنا زهقنا مش هنخليك تنبسط للآخر 😅.
فإجمالا، الفيلم تقييمه من وجهة نظري يتأرجح بين 7.5 و 8 حسب أنت هتشوف نهاية الفيلم ازاي 🤷.
انا بس بحذرك تأتي اهو متركزش اوي مع طريقة النطق عشان متقولش اني مقولتلكش 😁، كمان طقم التمثيل كان موفق جدا جدا الحقيقة وانا اسف لاني معرفش الناس دي مشهورة ولا لاء ومين دول اساسا، والا كنت قلتلك خد بالك من فلان وترتان عاملين شغل عالي، بس انا معرفهمش الصراحة فمش هفتي.
كمان صورة الفيلم، اقصد زوايا التصوير والكادرات، فيهم لقطات حلوة فشخ، فغالبا الواحد هيفكر يتابع حاجات برة الصندوق زي دي من فترة للتانية بس المهم يبقى فيها فكرة وقصة مش حشو والسلام.
ينصح بالمشاهدة جدا.
0 تعليقات