وتعكس الشروط الشعبية المقترحة كم كبير من الأمنيات التي يريدها المصريون في الرئيس المنتظر، ليحقق أمانيهم ورغباتهم.
كما أظهرت في مجملها مطالب بالبعد عن كل ما يتعلق بالرئيس السابق سواء بالكلمة أو الوصف أو التعليق وحتى الحركات والإيماءات التي كان يصدرها المخلوع!
وتتمثل الشروط في:
- ألا يكون منوفيا
- ألا يستخدم مصطلحات مثل "محدودي الدخل"، "المرحلة المقبلة"، "لا مساس"، وغيرها من الجمل التي كان تتردد على مسامع المصريين في عيد العمال أول مايو.
- كل يوم الصبح يسمع أغنية دامت لمين.
- ما يعملش زيارات مفاجئة للمصانع يوم السبت الساعة حداشر، احنا اللي حنعمل له زيارات مفاجئة كل تلات ساعات.
- مايفتكرش انه عشان بقى رئيس انه قائد الثورة.
- مايقولناش الإخوة والأخوات.. أمي ما خلفتش غيري انا واخواتي.
- اللي يقول كلمة بناء علي تعليمات السيد الرئيس يإعدامه مباشرة من غير محاكمة.
- يكون بيتكلم ويفهم إنجليزى من غير ما يطرطق ودانه.
- لو نجح بنسبة اكتر من 60% في الانتخابات يتحاكم.
- يبقى عارف اننا منتخبينه هوه مش هوه ومراته وابنه واخواته وامه وعيلته كلها.
- يبقى عنده فيسبوك وتويتر بس معندوش فارم فيل.. ويكتب تويت واحده ف اليوم عشان ميضيعش وقت الشعب.
- ميكونش ف لمعان وبريق حمادة هلال.
- يكون متواضع جدا.. بس طبعا مش لدرجة يقعد في خيمه دي تبقي فال شؤم.
- مراته لازم تاخد لقب سيدة مصر الأخيرة.
- مايقعدش فى القصر الجمهورى ياخد شقة ايجار جديد احسن.
- لازم كل جمعة بعد الصلاة يزور منطقة ويتكلم مع اهلها.
- ياكل العيش أبو شلن ويشرب من الحنفية.
- ماتكونش البدله بتاعتو مكتوب عليها اسمه.. عايزينه يجيب بدل من عند ابو نسمه.
- المفروض يقعد يفر كل حاجة في البلد، مش يقولنا "يا راجل كبر مخك".
- لازم يبقي عنده ريسيفر وتلفزيون وبيتفرج علي قناة الجزيرة.
- بيقول الكيان دوله الإحتلال مش دوله إسرائيل.
- مايكونش عمل أي ضربات جوية أو أرضية أو فضائية يذلنا بيها.
- مش كل ما نكلمه يقولنا عيب انا زي ابوكم.
- ميعطلش المرور عشان يروح مشوار يمشي في الشارع زيه زينا ياما يستخدم الطياره.
- الخوف من وجهه نظرى هو نتيجة لخوف الناس من نهايه كل شىء بيعكس اردتهم فيخافو حتى من بدء البدايه.
- لا يبدأ اي جملة بكلمة "سنظل".
- ما يقولش على منتخبنا كويس ومايتصلش بحسن شحاته ولا يزور اللاعبين في التمرين.
- لازم مايكونش راعى الرياضة والرياضيين ولا راعى الثقافة والمثقفين ولا راعى الفن والفنانين.
- ميضحكش علينا ويروح يفتتح نفس الحاجه عشرين مرة.
- ميكونش بيصلي العيد قبل العيد ما يبدأ وتلاقي صورته ملطوعه عالاهرام يوم الوقفه الساعه اتناشر بليل.
- يبطل كلمة نشجب وندين.
- مايكونش من محبي الاستقرار.
