المهم.. فوجئت بهرتلة البني آدم (عبد الرؤوف عون) عن زواج ملك اليمين، واللي بيقول على نفسه داعية إسلامي ومعتبر أنه أعلم أهل الأرض بالفقه والشريعه لمجرد أنه خريج أزهر، ده غير الفيديو المبتذل لمراسم الزواج.. حاجة زفت الصراحة
الأنكت بقى أن الإبراشي بشعره ده سواء كان طبيعي ولا باروكه، كان عامل فيها محايد وبيهاجم الأخ أبو دقن ده (مش هقدر اقول عليه داعية أبدا)، وواخد صف الراجل المحترم د. عبد الله النجار عضو مجمع البحوث الإسلامية، أعلى جهة علمية بالأزهر الشريف، وعضو مجمع الفقه الإسلامي بجده، استاذ الفقه المقارن بكلية الشريعه والقانون، على أساس أن اللي بيتفرج هندي أو عبيط، ومش هيفهم أنه بيروج للموضوع بشكل وقح (يعني لما أنت معارض الفكرة بتروجلها في برنامجك من الأصل ليه.. بتعمل دعاية مجانية لنوع جديد من انواع الزنا ليه).
الموضوع كله على بعضه لا يمت للإسلام بصلة، الإسلام بريء من مثل هؤلاء، الإسلام جاء ليعيد الحقوق لأصحابه ويحرم الرق والأستعباد، ويمنع الفواحش، يبقى إزاي عايزني اقتنع بالهرتلة بتاعة ملك اليمين دي.
بيقولك يتجوزها من غير ورق ولا مستندات، ومن غير ما يكون ليها حقوق، ومن حقها بعد الجواز تمشي كاشفه شعرها وتلبس هدوم قصيرة تكشف عن ساقيها وذراعيها، وتتحول من امرأة حرة إلى ملك يمن الباشا، ممكن تطلقه أو تنفصل عنه ف أي وقت وتروح تتجوز واحد تاني، يعني تقريبا كده حاجة اشبه بزواج المتعه المحرم شرعا، بس من غير ورق كمان.
يعني م الآخر (زنا مقنع) ملهوش عندي تفسير تاني.. حاجة تقرف بصراحة، وهجوم ممنهج غريب من ساعة مرسي ما بقى رئيس، زود على ده بقى موضوع السلفيين بتوع الأمر بالمعروف والنهي عن المنكر، اللي كانوا ف نفس الحلقة، اللي قتلوا طالب الهندسة ف السويس، واللي أهله قالوا بلسانهم أنهم ملتحين معتادي الإجرام.. ومش ممكن يكونوا ناس عايزة تطبق الشرع، ناس مدفعوه أو مأجوره.. ومع كده أبو شعر صمم انهم سلفيين إمعانا ف تشويه الإسلام السياسي.
ليه منقولش أنهم بقايا الحزب الوطني، وليه منقلش أنهم جماعات تكفيرية لقت فرصة للظهور، وهل كل واحد ربى دقنه وقال كام حديث بقى سلفي، وهل من الإسلام أنك تمشي تموت الناس ف الشارع لمجرد ان سلوكهم مش عاجبك؟
الأيام الجاية باينها هتبقى سودا.. الأخبار المتفبركه والترويع ونشر الخوف من الإسلاميين بقى على ودنه، دي حربهم الأخيرة عشان يوقعوا الثورة ويهدوها، في ظل تأسيس ما يسمى بالتيار الثالث لمكافحة الهيمنة الإسلامية على مناصب الدولة، واللي للإسف بيضم أشخاص كنا بنحترمهم ونثق فيهم وف حبهم للبلد.. حمدين صباحي وأبو حامد وغيرهم.
الإعلام الموجه الفاسد اللي على شاكلة الإبراشي وعكاشه وعائلة أديب وخيري رمضان ورؤساء الصحف بتوع السبوبة (مجدي الجلاد وخالد صلاح وإبراهيم عيسى).. لكم من الله ما تمكرون لعباده.. وحسبي الله ونعم الوكيل.
ملحوظة:
فكرت أن أضع فيديو الحلقة ليشاهدها من حالفه الحظ بعدم مشاهدتها، ثم تراجعت خوفا من أكون بهذا مساهما في نشر الفاحشة.. ربنا ينجينا ويعفي عنا
