كهربااااااااااااااااااااااا

كعادتي هذه الأيام، أتذكر ومضات من الطفولة بفعل فاعل.

بالمصادفة البحتة تعثرت في رابط على موقع التواصل الأجتماعي (فيس بوك FaceBook) لسؤال عن الأشياء التي كنا نقوم بها ونحن أطفال؟

طرافة السؤال دفعتني لمعرفة التفاصيل، وكانت هذه إختياراتي:
- اراقب كل خطوات النمل واشوفه رايح فين وبيعمل ايه
- اعمل اشكال بالميكانو
- احرق ورق بالعدسة المكبرة في الشمس
- اراقب الدبان والنمل
- أولع عيدان الكبريت و ارميها في الحوض
- ألعب كورة فى الشقة و أكسر كريستال النجفة

بينما كانت أختيارات أصدقائي أشد طرافة، وغرابة:
- أفتح أي لعبة عشان أشوف جواها إيه
- افتح الثلاجة واقفلها بشويش عشان اشوفها بتطفي النور ازاي
- ترمي حاجه من الشباك ونتفرج عليها وهي نازله وبتتكسر
- اقص ورق صغير وارميه من البلكونه
- اربط كيس بلاستيك بالخيط و اطيره من البلكونه ههههه
- بلعب كهربااا .. شد الكبس
- أرمى حاجة من الشباك على حد واقف ف الشارع مش ع الفاضى يعنى
- اركب العجلة و اجربها من غير سندات و كل مرة اقع
- اقعد على سور البلكونه
- اقطع النمل بالموس و احبس الدبان
- تحط صوابعك في المروحه وهي شغاله
- تكتب علي الحيط
- اولع فى النمل فى البلكونة بالعدسة المكبرة

لا أنكر أنني أصبت بالخضة من بعض الإختيارات، فمثلا، مين ده اللي كان قلبه حديد عشان يقعد يقطع النمل بالموس؟!!، وكان بيمسكه إذاي أصلا، والتاني اللي كان بيحط صوابعه ف المروحه وهي شغاله!!، وعم الحاج اللي كان بيولع في النمل بالعدسة المكبرة.

طفولة إيه دي؟

عل كده الواحد مكنش طفل أساسا، عندما تدرك أن كل الشقاوة التي كنت تمارسها من تنطيط قد يتطور في بعض الأحيان لخسائر مادية تتعلق بأشياء زجاجية تحطمت عن دون قصد، فأنت حتما ملاك بريء.

أما أن تمارس نوعا من (النيكرومانسر*) بتمزيق جثث النمل وحرقها، وتعذيب الذباب، حتى يشي عن مكان أخوانه واقاربه لتتمكن من إدراج أسمائهم على لائحة المطلوبين في تجاربك، فأنت بكل تأكيد طفل (عِفريت).

الغريب أن من اختاروا هذه الإجابات، وحسب معرفتي الشخصية بهم، لم يصبحوا طغاة، ولا قاطعي طرق، ولا مفسدين في الأرض.

بالعكس هم أكثر من تعرفت إليهم وتشرفت بصداقتهم هدوءا وطيبة، ما يعني أن المثل القائل (من شب على شيء شاب عليه)، مثل خاطيء بكل ما تحمله الكلمة من معان.

........................................
ملحوظة:
النيكرومانسر ساحر يستخدم أدوات معينة ويأكل أجزاء من جثث الموتى حتى يعرف ما عرفوا من أسرار، والسؤال الملح هنا لصديقي العزيز الذي كان يمزق النمل بالموس:
طعم النمل حلو، ولا مر؟