بعد منتصف الليل - شيرين هنائي

من كام يوم كده كنا اتكلمنا عن منصة Audiohat للدراما الإذاعية، والحلويات اللي بيقدموها أسبوعياً. وازاي بقت بحواديتها وحكايتها ملاذ آمن لجيل الثمانينات الغلبان اللي خسر حاجات كتير بيحبها مع الوقت ومرور الزمن.

ازاي أن شعار "عندما تدب الحياة في كتاب" مش مجرد كلام انشا ولا جملة موسيقية عاوزين يلفتوا بيها النظر، اد ماهي فعلاً جملة بتشرح حجم الجهد اللي بيبذلوه عشان يحولوا الروايات والقصص اللي كبرنا عليها لأعمال درامية جذابة تسمعها وكأنها قصة بتنبض حياة.

ما وراء الطبيعه، فانتازيا، فارس الأندلس، كوكتيل 2000، أرزاق، ومش هحسب ملف المستقبل عشان أنا مخصم معاهم لحد ما يحولوها هي كمان لدراما مش كتب صوتية

أسوة يعني بعملية عنق الزجاجة لرجل المستحيل اللي اتقدمت في احتفالات أكتوبر السنة دي، وكانت تحفة فنية بجد.

الفكرة هنا أن المتعة اللي بتحس بيها وأنت بتسمع الأعمال دي رغم أن معظمنا على الأغلب حافظ أحداثها صم، هو حنين وشوق لأيام ابتدائي، وإعدادي، ويمكن ثانوي كمان

لما كنا بنسرق أوقات فرحة قصيرة ونخبي القصص الجديدة أو اللي ما سبقش قريناها جوا كتب المدرسة.

لما كنا بنبدل القصص مع أصحابنا ومعارفنا، أو من المكتبات اللي كانت بتسمح بالتبديل عشان نقرأ الجديد.

إحساس الفرحة لما تشم ريحة الورق الأصفر وحبر الطباعة. شكل الأغلفة الملونة وملمسها، ورسوماتها اللي سحرت قلوبنا قبل عيونا.

ذكريات كتير أوي نجحت اوديوهات في أنها ترجعهالنا مع كل حكاية جديدة بيحكوها بطريقتهم البديعة.

لدرجة أن الواحد من كتر حبه في شغلهم فكرت إني أتخيل معاكم، وبمناسبة بداية الموسم السابع من برنامج بعد منتصف الليل، ياترى لو كانت المواسم الجديدة دي اللي بتبهرنا بيها أ. شيرين هنائي من ضمن إصدارات روايات الجيب هي كمان كان هيبقى شكلها ايه.

ما تيجي نشوف.