عزيزي البطل الخارق "سوبر بندق"!!

نزلت متأخر على ميعاد الشغل كالعادة، بقالي أكثر من أسبوعين مش عارف أصحى بدري، ورغم أني بضبط منبه التليفون، وبيقعد يزغرط جمب وداني بالربع الساعة، إلا أني برضوا بنزل متأخر.

أول ما حطيت رجلي بره باب البيت أصطدمت بالواقع المؤلم .. درجة حرارة فوق الخمسين، ومش عارف ليه بيكدبوا علينا كل يوم في نشرة الأخبار ويقنعونا انها 37، ده غير التراب والرطوبة اللي تخنق، وكأن الواحد بينزل من بيتهم كل يوم عشان يتمرمط في الجو الغريب ده.

مشيت لآخر الشارع عشان اركب الميكروباص، لقيت ناس ماشية طوابير على غير العادة، فعرفت على طول أن في مشكلة ما في مترو الأنفاق، وده عيب أنك تبقى ساكن جمب المترو، لأنه ساعة ما بيعطل الحياة بتتوقف بالمعنى الحرفي للكلمة، والدنيا بتبقى زحمة فشخ.

نص ساعة يا مؤمن، ومفيش كلب من سواقين الميكروباصت عاوز يقف للناس اللي دماغها ابتدت تسيح فعليا من شدة الحرارة، لحد ما ربنا كرم بواحد متعرفش لسه صاحي ولا معندوش خبرة الأستغلال والجشع لقيناه بينادي بعلو صوته فتكالبت الجموع على عربيته للظفر بكرسي أو حتى رجل ع الواقف.

بس عشان احنا طيبين بزيادة، الراجل ما رضاش يكسفنا وطلع خبرة، العربية بدل ما بتشيل ثلاثة في كل صف بقوا خمسة، والآجرة بقت بـ 2 جنيه بدل جنيه واللي مش عاجبه ينزل يترمي في الشارع.

الحقيقة الراجل كثر خيره وعداه العيب، بس اللي كان صعب يستحمله أي حيوان عنده احساس في الموقف ده، أنك تبقى قاعد مزنوق في الحر الرهيب ده مع ناس 95% منهم ميعرفش يعني إيه صابونة، وغالبا ما بيستحماش غير م العيد للعيد، ده إذا كان بيستحمى أصلا.

فضلت طول السكة بتنفس بحساب عشان ما اسحبش ريحة مش ولابد، لحد ما كان هيغمى عليا من نقص الأوكسجين، ولولا أني كنت متأخر ومينفعش أغيب كنت رجعت نمت في بيتنا، بس لأن الأنسان دعيف بطبعه، وفي لحظة معينة بتنهار فيها مقاومتك، مكنش ينفع استحمل بزيادة وكان لازم اتصرف مع العالم المعفنة دي.

في فترة الطفولة ولحد ما بقى عندي 15 سنة تقريبا، وزي أي طفل بيحترم نفسه، كانت شخصيات ميكي جيب بتمثل حاجة كبيرة جدا عندي، ولأن الأطفال في السن الصغير ده بتتعلق بالكاركترات الكوميدية زي سبونج بوب اليومين دول، أو الأبطال الخارقين، كان عندي ولع شديد جدا بشخصية البطل الرهيب سوبر بندق اللي بيقاوم الجريمة في مدينة البط.

أصلا بندق كان شخصية Pure فحت، لا بيعرف يداري ولا ليه في اللوع، فكان طبيعي أن أنا وغيري يبقى هو الـ Idol بتاعنا، وكان منطقى جدا أنه أول حاجة تيجي على بالي في الموقف المهبب ده، ياترى كان هيعمل إيه؟

يقلب العربية في بلاعة المجاري بعد ما يطلعني منها، ولا يقلعهم هدومهم الغرقانة عرق ويأكلهلهم بالعافية، ولا يعاقبهم ويحميهم بميه سخنة مغلية مدوبين فيها بُتاس، ولا يخلي لجنة بآمين شرطة مايساوش ثلاثة تعريفة يلمهم كلهم ويرميهم في حجز معفن لحد ما يبنالهم صاحب.

فضلت اتخيل كتير جدا في رد الفعل المناسب لسوبر بندق مع العالم الزبالة دي، لحد ما وصلت محطتي ونزلت وأنا كلي آمل أني أعرف في يوم من الأيام هو مخبي الفول السحري في أنهي داهية!.

لمعلوماتك:
سوبر بندق (Super Goofy) هو شخصية كرتونية سرية خارقة لبندق صديق ميكي الأقرب ورفيقه في معظم مغامراته، والذي يتحول إلى بطل خارق يمكنه الطيران وحمل الأثقال والرؤية عبر الأبواب والحوائط عندما يتناول حبات الفول السوداني السحرية العجيبة التي تنمو في حديقة منزله.

يرتدي سوبر بندق زي أحمر من قطعه واحدة أشبه بأزياء الأطفال الرضع، مع حرملة زرقاء!!.

يتبع....