هذه القصه ربما حدثت وربما لم تحدث وربما لن تحدث ابدا، المهم ان نتخذ منها العبره والعظه في صراعنا مع الحياه*****************
- عمو ممكن تعديني
إلتفت يمينا لأجد صبيا صغيرا لا يتجاوز عمره السنوات الخمس وعيناه فيهما نظرة تجمع التساؤل والتضرع معا
- ممكن يا حبيبي هات ايدك
انتقلنا الي الطرف الآخر من الشارع
- شكرا يا عمو
تكرر هذا المشهد اربعة ايام وفي اليوم الخامس وجدت نفسى مندفعا لمعرفة هذا الصبى الصغير
- اسمك ايه يا قمر
- اسمي خالد وانت يا عمو
ضحكت
- اسمى عبد العظيم وممكن تقولى يا عبده
- وبتشتغل ايه يا عبده
ابتسمت لذكاء الصبى وجرأته
- بشتغل محاسب ياسى خالد وانته
- انا لسه مش بشتغل بس بروح الحضانه
كان صبيا ذكيا تلتمع عيناه ببريق غريب يجذبك نحوه وقد توطدت علاقتي به كثيرا حتى انه اصبح يعلم مكان سكنى وعملى والمواصلات التى استخدمها ذهابا وعوده.
بصراحه كنت بقوله كل حاجه ف حياتى وكأنى بدردش مع واحد صاحبى
*****************
فى صباح احد الايام ركبت الاتوبيس فى طريقى لعملى وفجاة ضرب السواق (الله يسامحه) فرملة جابت الاتوبيس عالية واطية، لقيت نفسى مركون على راجل عجوز روحه هتطلع وف حضنى حته موزة انما ايه يا وعدى تحل من على حبل المشنقة.
- ايه يا مدام مالك؟
- انا اسفة معرفتش اسند نفسى.
- لا ولا يهمك اسندى اسندى احنا ورانا حاجة.
- نعم نعم يا ادلعدى جرى ايه يا فشله يا شكل القله.
- الله الله وليه الردح ده؟
ما علينا أخدت نظرة نارية وهى تستعد للنزول فى المحطة تمنيت معها ان اختفى من الوجود، بس آه يا خرابى حاجة حلوة طعامة لذاذه وجما............
- يا ولاد الـ ............. المحفظة يا غجر، على النعمة اروح فيكوا فى داهية.
احم ده انا
اكتشفت سرقة المحفظة وبها اكثر من 500 جنيه والبطاقة وكارنية النقابة وبعض الاوراق الهامة.
ما علينا هدئت اعصابى بعض الشئ وانا اضع رقم المحضر فى جيبى، وفى اليوم التالى واثناء ذهابى لعملى فوجئت بخالد ذاك الصبى الصغير وقد غطس ما بين دولابين – اقصد صبيين – يفوقونه حجما وعمرا وهات يا رزع فى الواد الصغير وبشهامتى المعروفه اندفعت كالسهم لتخليص صديقى الصغير من انياب الذئاب واثناء المعركه نلت نصيبى من الحب – اقصد الضرب - حتى تمكنت من نجدته واعادته الى منزله ثم هرولت للحاق بعملى
- يا خرابى يا دهوتى السوده الحقينى يا امه
احم ده انا برضه
ولاد الابلسه الملاعين الصغار سرقوا الشنطه وما بها من اوراق تخص العمل وظرف يحتوى على اكثر من 3000 جنية.
ما علينا .. رقم المحضر الثانى – فى اقل من 36 ساعة – يستقر الى جوار اخيه وقد اتخذت قرارا بمقاطعة المواصلات العامه والصبية الصغار واطمأننت تماما لهذا القرار.
- تاكسى
- على فين يا بيه
- روكسى يا اسطى بس بسرعه وحياتك
التاكسى وسيلة سريعة ومريحة وليس بها لصوص و.........
- تعفر يا بيه
نظرت الى السائق فى مرآة السيارة الداخلية ويده ممدوده بسيجارة من النوع المستورد الفاخر
- وماله هات نعفر يعنى هى هتقف على العفرة بتاعتنا
سحبت نفسا عميقا واستنشقت الدخان ذى الرائحة المميزة احسست اننى طائر فى حديقة غناء وحولى الفواكه والزهور والالوان الطبيعية والروائح الذكيـ.............
- انت يا لوح
- آه ..... آآآآآآآآآآآآآه يا دماغى انا فين ؟
- انت فى الصحراء يا روح أ.... ايه حد قالك ان هنا سبيل وله لوكانده السعاده ، ايه اللى منيلك هنا رد يا لوح ؟
اتضحت الصورة فجأة لأجد نفسى ملقى على الرمال والسماء المظلمة والنجوم الامعه من فوقى وأمامى يقف رائد شرطة وخلفة تسطع انوار سيارة الدورية وزملائه ينظرون ما بين متسائل ومندهش وهذا العسكرى الذ.........
- يا نهار اسود
الساعة، جاكت البدله، فلوسى .. اه يانا ياما
*****************
- تانى حرام عليك يا استاذ عبد العظيم حد قالك ان القسم ده مفتوح عشانك ارحمنا بقه ارحمنا
مازالت صرخات وتوسلات الضابط النوبتجى ترن فى اذنى للمحافظة على نفسى من اللصوص وقطاع الطرق حتى اننى وطوال الطريق الى المنزل رحت اتلفت يمينا ويسارا وكاننى اتوقع ظهور عصابة عبده افندى التى اقتصر نشاطها على سرقة ممتلكات العبد لله
*****************
ترن .. ترن .. ترن
استيقظت فى السابعة صباحا على صوت جرس الباب، يا ترى مين ع الصبح
- صباح افل يا باشا، نهارك قشطة ويومك نادى بإذن الله
- ايه ايه انت مين وعايز ايه
كان شاب لم يتجاوز العقد الثانى من عمره يحمل بعض الشنط البلاستيك فى يد وفى الاخرى يحمل بعض الزجاجات
- يا بيه انا مندوب شركه ( .............. ) للعطور وزى ما حضرتك شايف معايا عينات عطور ويا ريت تستفتحنى وتشترى منى، شوف يا بيه العلبة دى بتتباع فى المحلات مش اقل من 100 : 200 جنيه احنا عاملين عرض خاص وبنبيع الواحدة بـ 10 جنية بس ولو اشتريت علبتين تاخد التالتة بنص التمن يعنى تلت علب بـ 25 جنيه .. يا بلاش
اندهشت للعرض المغرى وفكرت ان ..
- شكلك مش مصدق يا بيه طب جرب ومش هتخسر
وقرن القول بالفعل وفشششششششششششششش ، اندفع الرزاز المعطر فى وجهى وانفى
ياسلااااااااااااااااااااااااااااام اما برفان يا حلاوة معقولة الجمال ده بعشرة جنية بس
- ها يا بيه شفت ازاى تشترى بقه ، قلت ايه.؟
لا ادرى خيل الى ان صوت البائع يبتعد ويبتعد ويبـ .......
- فوق – عبده افندى – لا اله الا الله يا عالم حد يتصل بالاسعاف
- آه ... آآآآآآآآآآآه يا راسى ايه ده انا فين
- الحمد لله – صوت مرسى افندى جارى – يا راجل خضتنا عليك ايه اللى جرالك وايه اللى رماك كده.
تلفت حولى كنت راقدا على باب الشقة والجيران من حولى ينظرون باستغراب وشفقة وتساؤل ورائحة البرفان المميزة منتشرة فى الجو و........ رائحة البرفاااااااااااااان يا خرابى – صرخت وانا اهرول الى داخل الشقة
- يا مرك يا عبده يا مرك يا عبده.
*****************
بعد ساعة توقفت سيارة شرطة في شارعنا وسرعان ما كان ظابط وامينا شرطه وثلاث عساكر امام باب الشقة
كنت جالسا القرفضاء واضعا رأسى فى الارض وانا اولول كالنساء
- انت يا جدع انت صاحب الشقة دى ؟
رفعت رأسى والدموع تغطى نصف وجهى تقريبا
- سرقونى يا بيه سرقونى
- يا نهار ملحوس هو انت، فيه ايه المرة دى كمان يا عبدالعظيم افندى سرقوا منك ايه قول قول واشجينى ؟
- الفيديو ، التلفزيون، 2 كاسيت ، المروحة، المنبه، ساعة الحائط وظرف فيه 10 تلاف جنيه و .....
- بس بس يا نهار منيل انت ايه بقى فيه عصابة تخصص عبده افندى انت ايه يا جدع مبتتعلمش دى رابع مرة تتسرق فى اقل من اربع ايام انت ايه حمار، امال لو مكنتش راجل متعلم سبت ايه للجهلة والبهايم حرام عليك حرام ...
*****************
بعد شهر
مازلت اعيش حالة من الذهول والترقب والامل فى العثور على ممتلكات العبد لله والامانى تنسج داخلى خيو.........
- عمو ممكن تعدينى
انطلق الهتاف بغتة عن يمينى فالتفت كالثور الهائج نحو مصدره وما حدث يتداعى امامى كشلال مدمر خد اللى حلتى وراح.
كانت صبية لا يتجاوز عمرها السنوات الخمس تمسك بتلابيب شاب وترجوه ان يساعدها فى عبور الشارع .
- ممكن يا قمر هاتى ايدك.
فجأة انفجرت فى الضحك دون سبب وخلعت جاكت البدله ونكشت شعرى والقيت بالنظارة والحقيبة واستلقيت فى عرض الطريق وانا اتلوى من الضحك واشير الى ذلك الشاب
- الحمار هيقشطوه، حد يقوله
حمار حد يقوله الحمار هاهاهاهاهاهاهاهاهاهاه.
*****************
- مسكين الدكاترة هنا بيقولوه ان عنده انهيار عصبى وكام فيوز من اللى فى دماغه ضربوا ومينفعش فيهم تصليح
التف ممرضى مستشفى العباسية للامراض العقلية حول زميلهم ينصتون اليه باهتمام وهو يكمل
- لا واغرب حاجه انه طول الوقت مفيش على لسانه غير كلمتين.
حمار حد يقوله الحمار.
تمت
ليست هناك تعليقات:
إرسال تعليق